ಕನ್ನಡದಲ್ಲಿ ನಾಟಕ ಚರಿತ್ರೆಯನ್ನು ಕಟ್ಟುವ ಕೃತಿಗಳು ಅತ್ಯಂತ ವಿರಳವೆಂಬ ಕೊರತೆಯನ್ನು ನೀಗಿಸುವ ಪುಟ್ಟದೊಂದು ಪ್ರಯತ್ನವನ್ನು ಮಾಡುವ ಪ್ರಸ್ತುತ ಕೃತಿಯು ಈ ದಿಸೆಯಲ್ಲಿ ಸಂಶೋಧನೆ ಮಾಡ ಬಯಸುವವರಿಗೆ ಹಲವು ದಾರಿಗಳನ್ನು ತೆರೆಯುತ್ತದೆ. ನಾಟಕ ಕಲೆಯು ಮನುಷ್ಯ ಜೀವಿಯ ಸದಭಿರುಚಿಯ ಸಂಕೇತವಾಗಿ ಅರಳಿದರೂ ಅದೊಂದು ಕಲಾತ್ಮಕ ಜವಾಬ್ದಾರಿಯಿಂದ ಸಮಾಜದ ಗತಿಬಿಂಬವಾಗಿರುವ ಸಂಗತಿಯನ್ನೂ ಸಂಕ್ಷಿಪ್ತ ಚರಿತ್ರೆಯೊಂದಿಗೆ ಈ ಕೃತಿ ನಿರೂಪಿಸುತ್ತದೆ. ಜಗತ್ತಿನ ಪ್ರಮುಖ ನಾಟಕಕಾರರ ಸಾಲಿನಲ್ಲಿ ಕನ್ನಡದ ನಾಟಕಕಾರರ ಸಾಧನೆಯನ್ನು ಕುರಿತ ಪಕ್ಷಿನೋಟದ ಆವಲೋಕನ ಈ ಕೃತಿಯ ಮಹತ್ವವನ್ನು ಹೆಚ್ಚಿಸಿದೆ. ಕನ್ನಡ ನಾಟಕ ಸಾಹಿತ್ಯವನ್ನು ಗಾಢವಾದ ಶ್ರದ್ಧೆಯಿಂದ ಅಭ್ಯಾಸ ಮಾಡಿರುವ ಡಾ. ಬಿ.ಎ. ಅನ್ನದಾನೇಶರ ಅಪಾರವಾದ ಜ್ಞಾನ ಈ ಕೃತಿಯುದ್ದಕ್ಕೂ ಮಿಂಚಿದೆ. ಕನ್ನಡ ನಾಟಕ ಸಾಹಿತ್ಯ ಮತ್ತು ಕನ್ನಡ ರಂಗಭೂಮಿಯ ಬಗ್ಗೆ ಆಸ್ಥೆಯಿರುವ ಎಲ್ಲರೂ ಓದಲೇಬೇಕಾದ ಸಂಕ್ಷಿಪ್ತ ಕನ್ನಡ ನಾಟಕ ಚರಿತ್ರೆ ಇದು.

-ಡಾ. ಎಚ್‌. ಎಸ್‌. ಸತ್ಯನಾರಾಯಣ