ಇವರು ಮೃದಂಗ ಸೃಜಿಸಿದವರು... ನಾವಿವರನ್ನು ಮರೆಗೆ ಸರಿಸಿದೆವು...

ಮೃದಂಗದಿಂದ ಹೊಮ್ಮುವ ನಾದದ ಮೂಲ ಯಾರು? ಈ ಸಂಗೀತ ಸಂಯೋಜನೆಯಲ್ಲಿ ಸತ್ತಿದ್ದು ಮತ್ತು ಜೀವಂತವಿರುವುದು ಹೇಗೆ ಒಂದಾಗಿ ಬೆರೆತು ಹೊರಹೊಮ್ಮುತ್ತವೆ? ಹಸು, ಮೇಕೆ ಮತ್ತು ಎಮ್ಮೆ ಚರ್ಮಗಳು ಪರಸ್ಪರರನ್ನು ಆಲಿಸುತ್ತ ಪರಸ್ಪರರ ಚಲನೆಗಳಿಗೆ ಪ್ರತಿಸ್ಪಂದಿಸುತ್ತ ತಾಗುತ್ತ ಜೊತೆಗೂಡುತ್ತ ನಡೆದಂತೆ ಸಂಗೀತ ಜರುಗುತ್ತದೆ.

ಹಾಗಿದ್ದರೆ ಧ್ವನಿಯನ್ನು ಯಾರು ಸೃಷ್ಟಿಸಿದರು?

ಕಲಾವಿದ ಈ ದೃಶ್ಯದಲ್ಲಿ ಪ್ರವೇಶಿಸುವ ಮೊದಲೇ, ವಿವಿಧ ಹೆಣಿಗೆ, ಬಣ್ಣ, ಧ್ವನಿ ಮತ್ತು ಆಕಾರಗಳನ್ನು ಒಂದೆಡೆ ತಂದು, ತಿರುಚಿ, ಮಡಚಿ, ಹಿಗ್ಗಿಸಿ, ಮುರಿದು, ಅರೆದು, ತೊಳೆದು, ಕತ್ತರಿಸಿ, ಎಲ್ಲವನ್ನೂ ಬೆಸುಗೆಯಾಗಿಸುವವರು ತಯಾರಕರು. ಅವರು ದೇವತೆಯೆಂತೆ. ಸತ್ತಿದ್ದು, ಜೀವಂತವಿರುವುದು, ನಿರ್ಜೀವವಾಗಿರುವುದು, ಕೃತಕವಾಗಿರುವುದು, ಈ ಎಲ್ಲವನ್ನೂ ಅವರು ಅರಿತು, ಅವೆಲ್ಲವನ್ನೂ ಪರಸ್ಪರ ಬೆಸೆಯುವ ವಿಧಾನವನ್ನು ಕಂಡುಕೊಳ್ಳುತ್ತಾರೆ. ಅವರಿಗೆ ಹೀಗೆ ನೋಡಿದೊಡನೆ ಅರಿವಾಗುತ್ತದೆ, ಮೃದಂಗದ ನಾದವನ್ನು ತಮ್ಮ ಬೆರಳುಗಳಲ್ಲಿ ಅನುಭವಿಸುತ್ತಾರೆ. ಹಾಗೆ ಅವರು ಮೊದಲ ಸಲ ಬೆರಳಿನಿಂದ ಘಾತಿಸಿದಾಗ ಅಥವಾ ತಟ್ಟಿದಾಗ ಮೃದಂಗವು ಜನ್ಮ ತಳೆಯುತ್ತದೆ.