ಮಕ್ಕಳಿಗೆ ಕತೆ ಇಷ್ಟ. ಅದರಲ್ಲೂ ನಾಯಿಕತೆಗಳು ಮತ್ತೂ ಇಷ್ಟ. ಅಂತಹಾ ಕತೆಗಳ ಮೂಲಕವೇ ಪ್ರಾಣಿ-ಪಕ್ಷಿಗಳ ಬದುಕಿನ ಬಗೆಯೂ ಮಕ್ಕಳಿಗೆ ತಿಳಿಯಬೇಕು. ಶಾಲಾ ಓದಿನ ಹೊರತಾದ ಸಂಗತಿಗಳೂ, ಮಲೆನಾಡಿನಲ್ಲಿ ಏನೆಲ್ಲಾ ರೋಚಕ ಘಟನೆಗಳು ನಡೆಯುತ್ತವೆ ಎನ್ನುವುದೂ ಅವರ ಅರಿವಿಗೆ ಬರಬೇಕು. ಅಂತಹಾ ವಾಸ್ತವ ಸಂಗತಿಗಳು ಸಿಗುವುದು ನಡೆದ ಘಟನೆಗಳ ಉಲ್ಲೇಖದಿಂದ! ಹಾಗಾಗಿ ನೆನಪಿನಾಳದಿಂದ ಕೆದಕಿ ಚಿಕ್ಕಂದಿನಲ್ಲಿ ನಡೆದ ಸ್ವಾರಸ್ಯವಾದ ಘಟನೆಗಳನ್ನೇ ಒಂದು ನಾಯಿಯನ್ನು ಕೇಂದ್ರವಾಗಿಟ್ಟುಕೊಂಡು ಕತೆಗೆ ಪೂರಕವಾಗಿ ಅಲ್ಪ ಸ್ವಲ್ಪ ಬದಲಾವಣೆಯೊಂದಿಗೆ ಇಲ್ಲಿ ಚಿತ್ರಿಸಿದ್ದೇನೆ. ನಡೆದ ಘಟನೆಗಳಾದ್ದರಿಂದ ಬರೀ ಮಕ್ಕಳು ಮಾತ್ರವಲ್ಲ; ಇದನ್ನು ದೊಡ್ಡವರೂ ಧಾರಾಳವಾಗಿ ಓದಬಹುದು! ದೊಡ್ಡ ಮಕ್ಕಳಿಗೆ ಓದಲು ಕೊಟ್ಟು ಚಿಕ್ಕ ಮಕ್ಕಳಿಗೆ ಓದಿ ಹೇಳಬಹುದು. ಅವರ ಜ್ಞಾನವನ್ನೂ ಹೆಚ್ಚಿಸಬಹುದು. 'ಮಕ್ಕಳಿಗಾಗಿ ಮಲೆನಾಡಿನ ರೋಚಕಕತೆಗಳ ಸರಣಿ'ಯ ಮೊದಲ ಕೃತಿ ಇದು.

ನಿಮ್ಮವ

ಗಿರಿಮನೆ ಶ್ಯಾಮರಾವ್