ಬೇರೆಲ್ಲೂ ಸಿಗದ ಒಳನೋಟ

ಈ ಗುಚ್ಛದ ಒಂದೊಂದೂ ಬಿಡಿಲೇಖನವನ್ನು ಓದಿ ಮುಗಿಸಲು' ಬಹುಶಃ ನಿಮಗೆ ಹತ್ತೇ ನಿಮಿಷ ಸಾಕು. ಆದರೆ ಮನನ ಮಾಡುತ್ತಾ ಓದಬೇಕಾದರೆ ಇನ್ನೂ ಹೆಚ್ಚು ಕಾಲ ಬೇಕು.ಶ್ರೀಸಾಮಾನ್ಯರಿಗೆ ಸುಲಭದಲ್ಲಿ ಅರ್ಥವಾಗದ ಬದುಕಿನ, ದೇಶ-ಜಗತ್ತುಗಳ 'ದೊಡ್ಡ' ಸಂಗತಿಗಳನ್ನು ನಾಗೇಶ ಹೆಗಡೆ ಪುಟ್ಟ ಕೈಗನ್ನಡಿಯಲ್ಲಿ ಹಿಡಿಸಿ ತೋರಿಸುತ್ತಾರೆ. ಎಂಥವರಿಗೂ ಮನದಟ್ಟಾಗಿಸುತ್ತಾರೆ. ಆ ಬಗ್ಗೆ ಒಂದು ಸ್ಪಷ್ಟ ಅಭಿಪ್ರಾಯಕ್ಕೆ ಬರಲು ನೆರವಾಗುತ್ತಾರೆ.

ಇಲ್ಲಿನ ಪ್ರತಿಯೊಂದು ಲೇಖನದ ಹಿಂದೆ ಆಳ ಅಧ್ಯಯನವಿದೆ. ಆವೇಶ, ಉದ್ವೇಗಗಳಿಲ್ಲದ ಪಕ್ವ ನೋಟವಿದೆ. ವರ್ಷಗಳ ಅಭ್ಯುದಯ, ಅವನತಿಗಳ ಸಾರವಿದೆ. ಸಮುದಾಯ ಹಿತಚಿಂತನೆಯ ದಟ್ಟ ಕಳಕಳಿಯಿದೆ. ನಮ್ಮ ಬದುಕಿನ ಮೇಲೆ ಪ್ರತ್ಯಕ್ಷ – ಪರೋಕ್ಷ ಪರಿಣಾಮ ಬೀರುವ ಮಹತ್ತರ ವಿಚಾರಗಳ ಬೇರೆಲ್ಲೂ ಸಿಗದ ಒಳನೋಟವಿದೆ. ಅದು ಮನದಲ್ಲಿ ಕೊರೆಯುತ್ತಾ, ಸಾತ್ವಿಕ ರೋಷ, ಅಸಹಾಯಕತೆ, ಅಚ್ಚರಿ ಹೀಗೆ ಬೇರೆಬೇರೆ ಭಾವನೆಗಳನ್ನು ಹುಟ್ಟಿಸುತ್ತವೆ.

- 'ಶ್ರೀ'ಪಡ್ರೆ